jahan jahan par darwaza tha wahan wahan diwar hui

jahāñ jahāñ par darvāza thā vahāñ vahāñ dīvār huī

kuchh to fazā-e-kūcha-e-jānāñ apne liye hamvār huī

tere 'alāva kise batā.eñ samjhe kaun ki tere baġhair

aur ik raat ārām se so.e aur ik raat udhār huī

ik kashtī kā bojh hai gahrī niiñd se bojhal lahroñ par

dil meñ dariyā paar utarne kī ḳhvāhish bedār huī

aao mil ke du'ā.eñ māñgeñ apne khet ujaḌne kī

ab ke ghar ghar aag baTegī fasl agar tayyār huī

dekh ‘ibādat-gāh ke darvāze par bhiiḌ faqīroñ kī

itnā chale aur ek qadam kī masāfat in par baar huī

in paudoñ ko kis dariyā ke paanī ne sairāb kiyā

ek hī phuul meñ rang se ḳhushbū saat samundar paar huī

aaj na jaane kyā guzregī tanhā sone vāloñ par

ik jaaḌe kī raat uupar se bārish mūslā-dhār huī

jahan jahan par darwaza tha wahan wahan diwar hui

kuchh to faza-e-kucha-e-jaanan apne liye hamwar hui

tere 'alawa kise bataen samjhe kaun ki tere baghair

aur ek raat aaram se soe aur ek raat udhaar hui

ek kashti ka bojh hai gahri nind se bojhal lahron par

dil mein dariya par utarne ki KHwahish bedar hui

aao mil ke du'aen mangen apne khet ujaDne ki

ab ke ghar ghar aag baTegi fasl agar tayyar hui

dekh ‘ibaadat-gah ke darwaze par bhiD faqiron ki

itna chale aur ek qadam ki masafat in par bar hui

in paudon ko kis dariya ke pani ne sairab kiya

ek hi phul mein rang se KHushbu sat samundar par hui

aaj na jaane kya guzregi tanha sone walon par

ek jaDe ki raat upar se barish musla-dhaar hui