jahan mein koi haqiqat bhi be-hijab nahin

jahāñ meñ koī haqīqat bhī be-hijāb nahīñ

urūs-e-marg ke muñh par magar naqāb nahīñ

talab hai husn-e-haqīqī kī fasl-e-gul bar-dosh

ye vo kitāb hai jis meñ ḳhizāñ kā baab nahīñ

ishāra kun hai haqīqat kā bahr-e-be-pāyāñ

ta.ayyunāt kā hāsil ba-juz habāb nahīñ

ye ābshār o gul o kohsār o māh-o-nujūm

muzāhire haiñ magar husn bā-naqāb nahīñ

maiñ be-piye tirī āñkhoñ ko baḌh ke chuum na luuñ

rahīn-e-minnat-e-mai mastī-e-shabāb nahīñ

fareb-e-vahm hai 'āġhā' ye ḳhud-farāmoshī

ba-hosh-bāsh nazar terī kāmyāb nahīñ

jahan mein koi haqiqat bhi be-hijab nahin

urus-e-marg ke munh par magar naqab nahin

talab hai husn-e-haqiqi ki fasl-e-gul bar-dosh

ye wo kitab hai jis mein KHizan ka bab nahin

ishaara kun hai haqiqat ka bahr-e-be-payan

tayyunat ka hasil ba-juz habab nahin

ye aabshaar o gul o kohsar o mah-o-nujum

muzahire hain magar husn ba-naqab nahin

main be-piye teri aankhon ko baDh ke chum na lun

rahin-e-minnat-e-mai masti-e-shabab nahin

fareb-e-wahm hai 'agha' ye KHud-faramoshi

ba-hosh-bash nazar teri kaamyab nahin