jahan se dur chal kahin pe len panah mushtarak

jahāñ se duur chal kahīñ pe leñ panāh mushtarak

hañsī ho mushtarak jahāñ hamārī aah mushtarak

hoñ kā.enāt ke safar meñ saath saath har qadam

to manzaroñ ke dekhne ko ho nigāh mushtarak

zamīñ ke har charāġh tak hai terī merī dastaras

falak pe haiñ sabhī sitāre mehr-o-māh mushtarak

zarā sī bevafā.ī par maiñ kis tarah nikāl duuñ

suno sadā rahegā ye dil-e-tabāh mushtarak

sadā rahā to ham-qadam suḳhan ke is maqām tak

haiñ sāñjhī ḳhil'ateñ hamārī 'izz-o-jāh mushtarak

kabhī na baar hoñ mohabbateñ rahe fazā-e-dil

‘alāhida kabhī kabhī to gāh-gāh mushtarak

azal se rāz-dāriyāñ haiñ tere mere darmiyāñ

savāb mushtarak haiñ apne sab gunāh mushtarak

hamāre ittihād ko hai kaafī itnā hī sabab

'adū haiñ mushtarak hamāre ḳhair-ḳhvāh mushtarak

parā.e des meñ nahīñ haiñ ajnabī ai ham-vatan

hai tere mere biich meñ vatan kī chaah mushtarak

munāfarat ke biij kis ne bo diye haiñ darmiyāñ

huī hai dū-ba-dū kabhī thī jo sipāh mushtarak

jahan se dur chal kahin pe len panah mushtarak

hansi ho mushtarak jahan hamari aah mushtarak

hon kaenat ke safar mein sath sath har qadam

to manzaron ke dekhne ko ho nigah mushtarak

zamin ke har charagh tak hai teri meri dastaras

falak pe hain sabhi sitare mehr-o-mah mushtarak

zara si bewafai par main kis tarah nikal dun

suno sada rahega ye dil-e-tabah mushtarak

sada raha to ham-qadam suKHan ke is maqam tak

hain sanjhi KHil'aten hamari 'izz-o-jah mushtarak

kabhi na bar hon mohabbaten rahe faza-e-dil

‘alahida kabhi kabhi to gah-gah mushtarak

azal se raaz-dariyan hain tere mere darmiyan

sawab mushtarak hain apne sab gunah mushtarak

hamare ittihad ko hai kafi itna hi sabab

'adu hain mushtarak hamare KHair-KHwah mushtarak

parae des mein nahin hain ajnabi ai ham-watan

hai tere mere bich mein watan ki chah mushtarak

munafarat ke bij kis ne bo diye hain darmiyan

hui hai du-ba-du kabhi thi jo sipah mushtarak