jahan usne jafa ki intiha ki

jahāñ us ne jafā kī intihā kī

vahī me.arāj thī apnī vafā kī

tumhārā husn hai merī ibādat

jo tum aa.e to yaad aa.ī ḳhudā kī

mohabbat jis ko raas aa jaa.e us ko

zarūrat kyā duā kī yā davā kī

na thā jab maiñ to vo tashrīf laa.e

zahe maqbūliyat merī duā kī

maza aayā sharāb-e-tund kā sā

tabī.at un kī jab barham huā kī

mohabbat zindagī kī varna ai dost

abas hai umr ne bhī go vafā kī

kamī thī kaun sī dil kī taḌap meñ

ki uljhan dīn-o-duniyā kī atā kī

ghaTā chhā.ī huī hai mai-kade par

ye kaifiyyat hai chashm-e-surma-sā kī

ab aao bhī ki hai ham se tumhāre

ye garmī bazm kī mastī fazā kī

'habīb' us kī taraf se ḳhud kashish hai

zarūrat kyā hai tujh ko rahnumā kī

jahan us ne jafa ki intiha ki

wahi mearaj thi apni wafa ki

tumhaara husn hai meri ibaadat

jo tum aae to yaad aai KHuda ki

mohabbat jis ko ras aa jae us ko

zarurat kya dua ki ya dawa ki

na tha jab main to wo tashrif lae

zahe maqbuliyat meri dua ki

maza aaya sharab-e-tund ka sa

tabiat un ki jab barham hua ki

mohabbat zindagi ki warna ai dost

abas hai umr ne bhi go wafa ki

kami thi kaun si dil ki taDap mein

ki uljhan din-o-duniya ki ata ki

ghaTa chhai hui hai mai-kade par

ye kaifiyyat hai chashm-e-surma-sa ki

ab aao bhi ki hai hum se tumhaare

ye garmi bazm ki masti faza ki

'habib' us ki taraf se KHud kashish hai

zarurat kya hai tujh ko rahnuma ki