jaise ham-bazm hain phir yar-e-tarah-dar se hum

jaise ham-bazm haiñ phir yār-e-tarah-dār se ham

raat milte rahe apne dar-o-dīvār se ham

sarḳhushī meñ yūñhī dil-shād o ġhazal-ḳhvāñ guzre

kū-e-qātil se kabhī kūcha-e-dildār se ham

kabhī manzil kabhī raste ne hameñ saath diyā

har qadam uljhe rahe qāfila-sālār se ham

ham se be-bahra huī ab jaras-e-gul kī sadā

varna vāqif the har ik rañg kī jhankār se ham

'faiz' jab chāhā jo kuchh chāhā sadā maañg liyā

haath phailā ke dil-e-be-zar-o-dīnār se ham

jaise ham-bazm hain phir yar-e-tarah-dar se hum

raat milte rahe apne dar-o-diwar se hum

sarKHushi mein yunhi dil-shad o ghazal-KHwan guzre

ku-e-qatil se kabhi kucha-e-dildar se hum

kabhi manzil kabhi raste ne hamein sath diya

har qadam uljhe rahe qafila-salar se hum

hum se be-bahra hui ab jaras-e-gul ki sada

warna waqif the har ek rang ki jhankar se hum

'faiz' jab chaha jo kuchh chaha sada mang liya

hath phaila ke dil-e-be-zar-o-dinar se hum