jaise hi zina bola tah KHane ka

jaise hī ziina bolā tah ḳhāne kā

kuñDlī maar ke baiThā saañp ḳhazāne kā

ham bhī zaḳhm-talab the apnī fitrat meñ

vo bhī kuchh sachchā thā apne nishāne kā

rāhib apnī zaat meñ shahr ābād kareñ

dair ke bāhar pahrā hai vīrāne kā

vaqt kī qaiñchī us ke paroñ ko kaaT ga.ī

sham' se rishta Tuut gayā parvāne kā

barse kyā be-faiz zamīñ par abr-e-karam

ḳhaak kā har zarra maqrūz hai daane daane kā

sub.h savere shabnam chāTne vaale phuul

dekh liyā ḳhamyāza pyaas bujhāne kā

baat kahī aur kah kar ḳhud hī kaaT bhī dī

ye bhī ik pairāya thā samjhāne kā

'tālib' un ko paanā to dushvār na thā

andesha thā ḳhud apne kho jaane kā

jaise hi zina bola tah KHane ka

kunDli mar ke baiTha sanp KHazane ka

hum bhi zaKHm-talab the apni fitrat mein

wo bhi kuchh sachcha tha apne nishane ka

rahib apni zat mein shahr aabaad karen

dair ke bahar pahra hai virane ka

waqt ki qainchi us ke paron ko kaT gai

sham' se rishta Tut gaya parwane ka

barse kya be-faiz zamin par abr-e-karam

KHak ka har zarra maqruz hai dane dane ka

subh sawere shabnam chaTne wale phul

dekh liya KHamyaza pyas bujhane ka

baat kahi aur kah kar KHud hi kaT bhi di

ye bhi ek pairaya tha samjhane ka

'talib' un ko pana to dushwar na tha

andesha tha KHud apne kho jaane ka