jal bhi sakta hai pairahan us ka

jal bhī saktā hai pairahan us kā

aag hī aag hai badan us kā

shahd kā zā.iqa hai chakhne meñ

chuum kar dekhiye dahan us kā

aur phir ik nishāñ ubhar aaya

haath jab chhū chukī kiran us kā

maiñ nahīñ dekhtā tirī sūrat

maiñ to bas dekhtā huuñ fan us kā

us pe jachtī hai har adā-e-jamāl

us ko zebā hai bāñkpan us kā

kaun aa.egā bā’d-e-qais yahāñ

rāstā dekhtā hai ban us kā

ḳhaak uḌātā hai dasht-o-sahrā kī

mauj meñ hai bahut hiran us kā

ashk aatā hai aañkh meñ ḳhud hī

ye samundar hai maujzan us kā

gūñjtā hai shabāna-roz 'āzar'

mere ehsās meñ suḳhan us kā

jal bhi sakta hai pairahan us ka

aag hi aag hai badan us ka

shahd ka zaiqa hai chakhne mein

chum kar dekhiye dahan us ka

aur phir ek nishan ubhar aaya

hath jab chhu chuki kiran us ka

main nahin dekhta teri surat

main to bas dekhta hun fan us ka

us pe jachti hai har ada-e-jamal

us ko zeba hai bankpan us ka

kaun aaega ba’d-e-qais yahan

rasta dekhta hai ban us ka

KHak uData hai dasht-o-sahra ki

mauj mein hai bahut hiran us ka

ashk aata hai aankh mein KHud hi

ye samundar hai maujzan us ka

gunjta hai shabana-roz 'azar'

mere ehsas mein suKHan us ka