جل بھی سکتا ہے پیرہن اس کا

جل بھی سکتا ہے پیرہن اس کا

آگ ہی آگ ہے بدن اس کا

شہد کا ذائقہ ہے چکھنے میں

چوم کر دیکھیے دہن اس کا

اور پھر اک نشاں ابھر آیا

ہاتھ جب چھو چکی کرن اس کا

میں نہیں دیکھتا تری صورت

میں تو بس دیکھتا ہوں فن اس کا

اس پہ جچتی ہے ہر ادائے جمال

اس کو زیبا ہے بانکپن اس کا

کون آئے گا بعد قیس یہاں

راستا دیکھتا ہے بن اس کا

خاک اڑاتا ہے دشت و صحرا کی

موج میں ہے بہت ہرن اس کا

اشک آتا ہے آنکھ میں خود ہی

یہ سمندر ہے موجزن اس کا

گونجتا ہے شبانہ روز آذرؔ

میرے احساس میں سخن اس کا