جلتے ہوئے گھروں کا دھواں میرے گھر میں ہے

جلتے ہوئے گھروں کا دھواں میرے گھر میں ہے

تسکین اضطراب حد معتبر میں ہے

رحمت کے عرض و طول کا انداز لا محال

توبہ کی آب و تاب دم مختصر میں ہے

تحریر اشتباہ سے گھبرائیے نہیں

ہاں ذوق شرح متن ہر اک نامہ بر میں ہے

ہم چاہ کر کہیں بھی ٹھہرنے نہ پائیں گے

یہ ساری کائنات برابر سفر میں ہے

یہ سارا دہر عرصۂ تحسیں ضرور ہے

بس ایک ماہتاب ہماری نظر میں ہے

رفعتؔ کہو شعار سکوں کس کا نام ہے

ہر ایک آدمی یہاں خوف و خطر میں ہے