جلوہ بس روئے جلوہ گر تک ہے

جلوہ بس روئے جلوہ گر تک ہے

زندگی آمد سحر تک ہے

سجدۂ شوق میرے سر تک ہے

سر مرا ان کے سنگ در تک ہے

تیری دنیا ہے میری ہستی تک

میری دنیا تری نظر تک ہے

اے مری آہ لوٹ کیوں آئی

جب رسائی در اثر تک ہے

اے دل بے خبر تری منزل

کیا کہوں ایک باخبر تک ہے

ہائے صیاد جرأت پرواز

تو سمجھتا ہے بال و پر تک ہے

اب جو ہوتے نہیں سجود نیاز

دیکھ مغموم سنگ در تک ہے

صرف آنکھیں نہیں ہیں مضطر دید

یہ خلش تو دل و جگر تک ہے

شوق سے ہاں الٹیے آپ نقاب

جلوہ بہزادؔ کی نظر تک ہے