جنم سے پہلے کی کھاتا بہی کی قید میں ہوں

جنم سے پہلے کی کھاتا بہی کی قید میں ہوں

میں ایک بوڑھی سی پاگل صدی کی قید میں ہوں

وہ جس سے موت نکالے گی ایک دن آ کر

تمہیں خبر ہے اسی زندگی کی قید میں ہوں

مجھے کسی کے غموں کا خیال کیوں آئے

مرے عزیز میں اپنی خوشی کی قید میں ہوں

میں جب سے نکلا ہوں اس لامکاں کی چاہت میں

ہر ایک گام کسی روشنی کی قید میں ہوں

لو اس کی یاد کے پنچھی اڑا دئے میں نے

ابھی نہ کہنا مجھے میں کسی کی قید میں ہوں

نکل کے جائے کہاں عکس آئنے سے میرا

میں جس کے سامنے دانش وری کی قید میں ہوں

عجیب بات ہے جس کی اسیر ہے دنیا

مجھے خبر ہی نہیں میں اسی کی قید میں ہوں

سمجھ میں کچھ نہیں آتا میں کیا کروں ارمانؔ

بہت دنوں سے کسی اجنبی کی قید میں ہوں