jangal se jate jate yahi kaam kar diya

jangal se jaate jaate yahī kaam kar diyā

ham ne har ek peḌ tire naam kar diyā

jab bhī tumhārī āñkheñ hameñ yaad aa.ī haiñ

raushan koī charāġh lab-e-bām kar diyā

lab pe jo lab rakhe to unheñ kar diyā gulāb

āñkhoñ ko chhū liyā to unheñ jaam kar diyā

kis ne diye kī lau meñ lapeTī shab-e-darāz

kis ne havā ke zor ko nākām kar diyā

ye pairahan bhī pahnā hai pākīzgī ke saath

ham ne tumhārī yaad ko ehrām kar diyā

bāloñ meñ us ne phuul mire naam kā rakhā

ḳhushbū se merā zikr sar-e-'ām kar diyā

in ḳhvāhishoñ kā aur kyā honā thā intizām

nazr-e-mizāj-e-gardish-e-ayyām kar diyā

'az.har' hamāre paas koī mo'jiza nahīñ

rāvan kā haath chūmā use raam kar diyā

jangal se jate jate yahi kaam kar diya

hum ne har ek peD tere nam kar diya

jab bhi tumhaari aankhen hamein yaad aai hain

raushan koi charagh lab-e-baam kar diya

lab pe jo lab rakhe to unhen kar diya gulab

aankhon ko chhu liya to unhen jam kar diya

kis ne diye ki lau mein lapeTi shab-e-daraaz

kis ne hawa ke zor ko nakaam kar diya

ye pairahan bhi pahna hai pakizgi ke sath

hum ne tumhaari yaad ko ehram kar diya

baalon mein us ne phul mere nam ka rakha

KHushbu se mera zikr sar-e-'am kar diya

in KHwahishon ka aur kya hona tha intizam

nazr-e-mizaj-e-gardish-e-ayyam kar diya

'azhar' hamare pas koi mo'jiza nahin

rawan ka hath chuma use ram kar diya