jawani mein nazar ko tabe-e-ahkaam hone do

javānī meñ nazar ko tābe-e-ahkām hone do

ye uTh jaa.e jidhar us samt qatl-e-ām hone do

adāoñ ko sharīk-e-gardish-e-ayyām hone do

javānī meñ kisī kī hashr kā hañgām hone do

nazar ke saath ho jā.egā qaa.em daur-e-mai-ḳhāna

zarā gardish meñ chashm-e-sāqī-e-gulfām hone do

nazar aa jā.egā duniyā ko barq-o-tūr kā aalam

dam-e-dīdār be-ḳhud mujh ko zer-e-bām hone do

na ham dil ko chhupā.eñ aur na tum phero nigāhoñ ko

ham apnā kaam hone deñ tum apnā kaam hone do

ḳhudā ma.alūm le jaa.e kahāñ zauq-e-talab mujh ko

abhī to be-ḳhudī-e-shauq kā anjām hone do

kamī hai marne vāloñ kī na qātil kī zamāne meñ

kisī kī har adā kahtī hai qatl-e-ām hone do

ḳhudā vaalo na roko mujh ko mere zauq-e-isyāñ se

mujhe roz-e-qayāmat morid-e-ilzām hone do

abhī kuchh gardisheñ baaqī haiñ jām-e-zīst kī 'afqar'

abhī kuchh der shaġhl-e-bāda-e-gulfām hone do

jawani mein nazar ko tabe-e-ahkaam hone do

ye uTh jae jidhar us samt qatl-e-am hone do

adaon ko sharik-e-gardish-e-ayyam hone do

jawani mein kisi ki hashr ka hangam hone do

nazar ke sath ho jaega qaem daur-e-mai-KHana

zara gardish mein chashm-e-saqi-e-gulfam hone do

nazar aa jaega duniya ko barq-o-tur ka aalam

dam-e-didar be-KHud mujh ko zer-e-baam hone do

na hum dil ko chhupaen aur na tum phero nigahon ko

hum apna kaam hone den tum apna kaam hone do

KHuda malum le jae kahan zauq-e-talab mujh ko

abhi to be-KHudi-e-shauq ka anjam hone do

kami hai marne walon ki na qatil ki zamane mein

kisi ki har ada kahti hai qatl-e-am hone do

KHuda walo na roko mujh ko mere zauq-e-isyan se

mujhe roz-e-qayamat morid-e-ilzam hone do

abhi kuchh gardishen baqi hain jam-e-zist ki 'afqar'

abhi kuchh der shaghl-e-baada-e-gulfam hone do