jazb-e-gham aur is qadar yaro

jazb-e-ġham aur is qadar yaaro

kyoñ na ulfat kā ho asar yaaro

aur abhī kitnī duur hai manzil

ḳhatm hogā bhī ye safar yaaro

din meñ guzrī vo mere dil pe ki phir

chain aayā na raat bhar yaaro

parda-dar-parda manzil-e-maqsūd

pech-dar-pech rah-guzar yaaro

dil jo thā ḳhāna-e-ḳhudā kal tak

aaj hai vo butoñ kā ghar yaaro

maut ko DhūñDne chalī hai kidhar

zindagī ham se ruuTh kar yaaro

bhuul jaate haiñ hādse dil se

nahīñ jaatī kasak magar yaaro

dil meñ baaqī hai jur.at-e-parvāz

kyā zarūrī haiñ bāl-o-par yaaro

lab pe bulbul ke hai 'ziyā' kī ġhazal

khil uThā ġhuncha-e-sahar yaaro

jazb-e-gham aur is qadar yaro

kyon na ulfat ka ho asar yaro

aur abhi kitni dur hai manzil

KHatm hoga bhi ye safar yaro

din mein guzri wo mere dil pe ki phir

chain aaya na raat bhar yaro

parda-dar-parda manzil-e-maqsud

pech-dar-pech rah-guzar yaro

dil jo tha KHana-e-KHuda kal tak

aaj hai wo buton ka ghar yaro

maut ko DhunDne chali hai kidhar

zindagi hum se ruTh kar yaro

bhul jate hain hadse dil se

nahin jati kasak magar yaro

dil mein baqi hai jurat-e-parwaz

kya zaruri hain baal-o-par yaro

lab pe bulbul ke hai 'ziya' ki ghazal

khil uTha ghuncha-e-sahar yaro