جذب غم اور اس قدر یارو

جذب غم اور اس قدر یارو

کیوں نہ الفت کا ہو اثر یارو

اور ابھی کتنی دور ہے منزل

ختم ہوگا بھی یہ سفر یارو

دن میں گزری وہ میرے دل پہ کہ پھر

چین آیا نہ رات بھر یارو

پردہ در پردہ منزل مقصود

پیچ در پیچ رہگزر یارو

دل جو تھا خانۂ خدا کل تک

آج ہے وہ بتوں کا گھر یارو

موت کو ڈھونڈنے چلی ہے کدھر

زندگی ہم سے روٹھ کر یارو

بھول جاتے ہیں حادثے دل سے

نہیں جاتی کسک مگر یارو

دل میں باقی ہے جرأت پرواز

کیا ضروری ہیں بال و پر یارو

لب پہ بلبل کے ہے ضیاؔ کی غزل

کھل اٹھا غنچہ سحر یارو