jazb-e-ulfat ne dikhaya asar apna ulTa

jazb-e-ulfat ne dikhāyā asar apnā ulTā

aah jab hoñThoñ par aa.ī to kaleja ulTā

rāt-bhar baiThe rahe muntazarī meñ us kī

sub.h jab ho ga.ī hasrat se bichhaunā ulTā

haq-ba-jānib hai agar ham se vo mahvash phir jaa.e

chalan aflāk kā auñdhā hai zamānā ulTā

jā-e-hairat hai jo nafrat na ho ḳhud-bīnī se

nazar aatā hai is ā.īne meñ chehrā ulTā

zīnat-e-rañg-e-baqā chāhte haiñ naqsh-e-fanā

us muraqqe kā dikhā.ī diyā naqsha ulTā

malgajī chādar-e-mahtāb nazar aane lagī

us ne chehre se jo sote meñ dupaTTā ulTā

ab to yāroñ se bhī yaarī kī tavaqqo.a na rahī

hāl-pursī ke evaz karte haiñ shikvā ulTā

qufl darvāze meñ kyuuñ aaj nazar aatā hai

kaun jhāñkā tumheñ kis shaḳhs ne pardā ulTā

mar gayā maiñ jo mujhe pyaar se maarā us ne

sīdhī talvār huā us kā tamāñcha ulTā

mai-kada chhoḌ ke kyuuñ ḳhum meñ falātūñ baiThā

aisī hī aql ne yūnān kā taḳhta ulTā

maraz-e-ishq meñ ārām kisī taur nahīñ

kabhī sīdhā jo dam aayā to kaleja ulTā

phir ulaT kar na ḳhabar lī hue aise ġhāfil

ab to aao ki maiñ dam letā huuñ ulTā ulTā

na to vo phuul na kaliyāñ na vo sabza na bahār

rut kī phirtī hai chaman-zār kā taḳhta ulTā

ek jalva to bhalā aur bhī vaqt-e-ruḳhsat

bahr-e-gul bād-e-bahārī koī jhoñkā ulTā

'bahr' kyā kūcha-e-jānāñ se phire ghar kī taraf

kabhī dekhā nahīñ bahte hue dariyā ulTā

jazb-e-ulfat ne dikhaya asar apna ulTa

aah jab honThon par aai to kaleja ulTa

raat-bhar baiThe rahe muntazari mein us ki

subh jab ho gai hasrat se bichhauna ulTa

haq-ba-jaanib hai agar hum se wo mahwash phir jae

chalan aflak ka aundha hai zamana ulTa

ja-e-hairat hai jo nafrat na ho KHud-bini se

nazar aata hai is aaine mein chehra ulTa

zinat-e-rang-e-baqa chahte hain naqsh-e-fana

us muraqqe ka dikhai diya naqsha ulTa

malgaji chadar-e-mahtab nazar aane lagi

us ne chehre se jo sote mein dupaTTa ulTa

ab to yaron se bhi yari ki tawaqqoa na rahi

haal-pursi ke ewaz karte hain shikwa ulTa

qufl darwaze mein kyun aaj nazar aata hai

kaun jhanka tumhein kis shaKHs ne parda ulTa

mar gaya main jo mujhe pyar se mara us ne

sidhi talwar hua us ka tamancha ulTa

mai-kada chhoD ke kyun KHum mein falatun baiTha

aisi hi aql ne yunan ka taKHta ulTa

maraz-e-ishq mein aaram kisi taur nahin

kabhi sidha jo dam aaya to kaleja ulTa

phir ulaT kar na KHabar li hue aise ghafil

ab to aao ki main dam leta hun ulTa ulTa

na to wo phul na kaliyan na wo sabza na bahaar

rut ki phirti hai chaman-zar ka taKHta ulTa

ek jalwa to bhala aur bhi waqt-e-ruKHsat

bahr-e-gul baad-e-bahaari koi jhonka ulTa

'bahr' kya kucha-e-jaanan se phire ghar ki taraf

kabhi dekha nahin bahte hue dariya ulTa