jhalak parde se yun rah rah ke dikhlane se kya hasil

jhalak parde se yuuñ rah rah ke dikhlāne se kyā hāsil

ye ThanDī garmiyāñ bhī darmiyāñ laane se kyā hāsil

rahe jab ḳhaak pā-e-sham.a par jal kar to jalnā hai

nahīñ girya to parvānoñ ke jal jaane se kyā hāsil

abad tak saañs lene aur ġham sahne meñ lazzat hai

dayār-e-ishq meñ ghabrā ke mar jaane se kyā hāsil

nahīñ hotā hai koī kaam hargiz vaqt se pahle

umīd-o-ārzū meñ dil ko taḌpāne se kyā hāsil

na yuuñ TūTīñ na TūTeñgī kabhī zindāñ kī dīvāreñ

koī sar phoḌ kar mar jaa.e mar jaane se kyā hāsil

taras aayā hai zālim ko na aa.e kam-nasīboñ par

taras hī aa gayā jab to sitam Dhāne se kyā hāsil

agar mai-ḳhvār ik ik buuñd ko saaqī taras jaa.eñ

tire jām-o-subū se tere maiḳhāne se kyā hāsil

mohabbat kā kahīñ dāman bharā hai bhiik māñge se

tumhīñ kah do hamāre haat phailāne se kyā hāsil

abhī baaqī hai ik ummīd-e-marg-e-nā-gahāñ lekin

usī zindāñ meñ phir aa.e to mar jaane se kyā hāsil

usī ke tevaroñ ko dekhtī rahtī haiñ taqdīreñ

dil-e-rāhat-talab bechain ho jaane se kyā hāsil

'jigar' apne liye jiinā koī jiine meñ jiinā hai

na kaam aa.eñ kisī ke to jiye jaane se kyā hāsil

'jigar' hai zindagī jab tak ki garmī hai mohabbat kī

huā jab sard siina to jiye jaane se kyā hāsil

jhalak parde se yun rah rah ke dikhlane se kya hasil

ye ThanDi garmiyan bhi darmiyan lane se kya hasil

rahe jab KHak pa-e-shama par jal kar to jalna hai

nahin girya to parwanon ke jal jaane se kya hasil

abad tak sans lene aur gham sahne mein lazzat hai

dayar-e-ishq mein ghabra ke mar jaane se kya hasil

nahin hota hai koi kaam hargiz waqt se pahle

umid-o-arzu mein dil ko taDpane se kya hasil

na yun TuTin na TuTengi kabhi zindan ki diwaren

koi sar phoD kar mar jae mar jaane se kya hasil

taras aaya hai zalim ko na aae kam-nasibon par

taras hi aa gaya jab to sitam Dhane se kya hasil

agar mai-KHwar ek ek bund ko saqi taras jaen

tere jam-o-subu se tere maiKHane se kya hasil

mohabbat ka kahin daman bhara hai bhik mange se

tumhin kah do hamare hat phailane se kya hasil

abhi baqi hai ek ummid-e-marg-e-na-gahan lekin

usi zindan mein phir aae to mar jaane se kya hasil

usi ke tewaron ko dekhti rahti hain taqdiren

dil-e-rahat-talab bechain ho jaane se kya hasil

'jigar' apne liye jina koi jine mein jina hai

na kaam aaen kisi ke to jiye jaane se kya hasil

'jigar' hai zindagi jab tak ki garmi hai mohabbat ki

hua jab sard sina to jiye jaane se kya hasil