jhuk gaya jin ka taraazu zalimon ke samne

jhuk gayā jin kā tarāzū zālimoñ ke sāmne

kyā duhā.ī dījiye un munsifoñ ke sāmne

sarhadoñ meñ baañT dī ahl-e-siyāsat ne zamīñ

dil judā kab haiñ zamīnī sarhadoñ ke sāmne

bevafā.ī ne tirī dil ko malāl aisā diyā

Dūbtī haiñ kashtiyāñ juuñ sāhiloñ ke sāmne

aisī ātish thī hue ḳhāshāk ham sarsabz tan

naam mat le hijr kā ham dil-jaloñ ke sāmne

vaqt ne chhīne haiñ jin se ḳhatt-o-ḳhāl-e-zindagī

Darte haiñ jaate hue vo ā.inoñ ke sāmne

'ishq kī mo’jiz-numā.ī par hamārā e'tiqād

aap jhukte haiñ havas ke sho’badoñ ke sāmne

diid kā bas ek lamha hijr sadiyoñ par muhīt

niiñd kā pal jaise lākhoñ ratjagoñ ke sāmne

piiTh dikhlāte haiñ dushman ko jo buzdil kī tarah

sher bante haiñ vo apne hāmiyoñ ke sāmne

aur haiñ jo is kī chaukhaT par jabīñ-sā.ī kareñ

hech hai duniyā magar dīda-varoñ ke sāmne

us ke andāz-e-masīhā.ī kā 'nasrīñ' shukriya

rakh diyā hai jis ne nashtar ābloñ ke sāmne

jhuk gaya jin ka taraazu zalimon ke samne

kya duhai dijiye un munsifon ke samne

sarhadon mein banT di ahl-e-siyasat ne zamin

dil juda kab hain zamini sarhadon ke samne

bewafai ne teri dil ko malal aisa diya

Dubti hain kashtiyan jun sahilon ke samne

aisi aatish thi hue KHashak hum sarsabz tan

nam mat le hijr ka hum dil-jalon ke samne

waqt ne chhine hain jin se KHatt-o-KHal-e-zindagi

Darte hain jate hue wo aainon ke samne

'ishq ki mo’jiz-numai par hamara e'tiqad

aap jhukte hain hawas ke sho’badon ke samne

did ka bas ek lamha hijr sadiyon par muhit

nind ka pal jaise lakhon ratjagon ke samne

piTh dikhlate hain dushman ko jo buzdil ki tarah

sher bante hain wo apne hamiyon ke samne

aur hain jo is ki chaukhaT par jabin-sai karen

hech hai duniya magar dida-waron ke samne

us ke andaz-e-masihai ka 'nasrin' shukriya

rakh diya hai jis ne nashtar aablon ke samne