jhum ke abr uTha chand hi lamhat ke baad

jhuum ke abr uThā chand hī lamhāt ke baa'd

āsmāñ TuuT ke barsā hai munājāt ke baa'd

ab vo nā-karda gunāhoñ ke bane haiñ mujrim

qatl hone se bache the jo fasādāt ke baa'd

ham-nashīñ taaj kī tā'mīr ko āsān na jaan

haath kaT jaate haiñ ikrām-o-‘ināyāt ke baa'd

tujh ko paane kī talab tere bichhaḌ jaane kā ġham

yaad aatī hai koī baat kisī baat ke baa'd

chāñd khiḌkī se utar aayā thā kamre meñ 'vasīm'

phir hameñ niind na aa.ī kabhī us raat ke baa'd

jhum ke abr uTha chand hi lamhat ke ba'd

aasman TuT ke barsa hai munajat ke ba'd

ab wo na-karda gunahon ke bane hain mujrim

qatl hone se bache the jo fasadat ke ba'd

ham-nashin taj ki ta'mir ko aasan na jaan

hath kaT jate hain ikram-o-‘inayat ke ba'd

tujh ko pane ki talab tere bichhaD jaane ka gham

yaad aati hai koi baat kisi baat ke ba'd

chand khiDki se utar aaya tha kamre mein 'wasim'

phir hamein nind na aai kabhi us raat ke ba'd