jine ke liye jaan se guzarna bhi to sikho

jiine ke liye jaañ se guzarnā bhī to sīkho

marte hī ho to shauq se marnā bhī to sīkho

hai abrū-e-ḳhamdār-e-hasīna to nazar meñ

gardan kabhī talvār pe dharnā bhī to sīkho

shabnam kī tarah raat ko ro.eñge kahāñ tak

sabze kī tarah sub.h ubharnā bhī to sīkho

mahkoñ kī tarah mauj ke ruḳh par to bahe ḳhuub

ab kaaT ke dhāre ko guzarnā bhī to sīkho

chal sakte nahīñ leT ke phislo sū-e-manzil

daldal se nikalnā hai ubharnā bhī to sīkho

andāz ho kuchh phir bhī tajallī nahīñ mushkil

tum vādī-e-aiman meñ utarnā bhī to sīkho

hai izn to saaqī kā ki bhar sakte ho sāġhar

sīdhā to karo jaam kā bharnā bhī to sīkho

pindār na bedār ho so.e na ḳhudī bhī

phir faqr meñ is rang kā bharnā bhī to sīkho

bigḌe hue hālāt banāne se baneñge

bigḌī huī duniyā meñ sudharnā bhī to sīkho

kyā manzilat-e-husn hai tahsīn-e-zabānī

jis baat meñ ḳhūbī hai vo karnā bhī to sīkho

Thukrā.e zamāna to vo dāman meñ chhupā leñ

sar un ke qadam par kabhī dharnā bhī to sīkho

Dar kyā hai Darā.eñ tumheñ duniyā kī balā.eñ

'ārif' magar allāh se Darnā bhī to sīkho

jine ke liye jaan se guzarna bhi to sikho

marte hi ho to shauq se marna bhi to sikho

hai abru-e-KHamdar-e-hasina to nazar mein

gardan kabhi talwar pe dharna bhi to sikho

shabnam ki tarah raat ko roenge kahan tak

sabze ki tarah subh ubharna bhi to sikho

mahkon ki tarah mauj ke ruKH par to bahe KHub

ab kaT ke dhaare ko guzarna bhi to sikho

chal sakte nahin leT ke phislo su-e-manzil

daldal se nikalna hai ubharna bhi to sikho

andaz ho kuchh phir bhi tajalli nahin mushkil

tum wadi-e-aiman mein utarna bhi to sikho

hai izn to saqi ka ki bhar sakte ho saghar

sidha to karo jam ka bharna bhi to sikho

pindar na bedar ho soe na KHudi bhi

phir faqr mein is rang ka bharna bhi to sikho

bigDe hue haalat banane se banenge

bigDi hui duniya mein sudharna bhi to sikho

kya manzilat-e-husn hai tahsin-e-zabani

jis baat mein KHubi hai wo karna bhi to sikho

Thukrae zamana to wo daman mein chhupa len

sar un ke qadam par kabhi dharna bhi to sikho

Dar kya hai Daraen tumhein duniya ki balaen

'arif' magar allah se Darna bhi to sikho