jin se raushan thin fazaen kabhi viranon ki

jin se raushan thiiñ fazā.eñ kabhī vīrānoñ kī

yaad aatī hai unhī chāk-garebānoñ kī

jab kabhī kā'be kī tā'mīr kā vaqt aatā hai

pahle buniyād uThā kartī hai but-ḳhānoñ kī

shukriya mere safīne ko Dubone vaalo

mujh ko minnat na uThānī paḌī tūfānoñ kī

raushnī ho ki na ho sham' jale yā na jale

shab to kaTtī hai bahar-hāl siyah-ḳhānoñ kī

mai-kada ḳhatre meñ hai teġh uThā ai saaqī

aaj rindoñ ko zarūrat nahīñ paimānoñ kī

kyoñ Darātī hai hameñ mauj-e-balā rah-rah kar

shorisheñ ham ne bahut dekhī haiñ tūfānoñ kī

iḳhtilāfāt asīroñ meñ abhī tak haiñ 'aqīl'

ye siyāsat na ho zindāñ ke nigahbānoñ kī

jin se raushan thin fazaen kabhi viranon ki

yaad aati hai unhi chaak-garebanon ki

jab kabhi ka'be ki ta'mir ka waqt aata hai

pahle buniyaad uTha karti hai but-KHanon ki

shukriya mere safine ko Dubone walo

mujh ko minnat na uThani paDi tufanon ki

raushni ho ki na ho sham' jale ya na jale

shab to kaTti hai bahar-haal siyah-KHanon ki

mai-kada KHatre mein hai tegh uTha ai saqi

aaj rindon ko zarurat nahin paimanon ki

kyon Daraati hai hamein mauj-e-bala rah-rah kar

shorishen hum ne bahut dekhi hain tufanon ki

iKHtilafat asiron mein abhi tak hain 'aqil'

ye siyasat na ho zindan ke nigahbanon ki