jis ko dekha tha kabhi husn ke paikar ki tarah

jis ko dekhā thā kabhī husn ke paikar kī tarah

ab ḳhayāloñ meñ vahī shaḳhs hai manzar kī tarah

rāh-e-maqtal se zarā ḳhud ko bachā kar niklo

chashm-e-qātil kī ġhazab-nākī hai ḳhanjar kī tarah

us kī maḳhmūr nigāhoñ meñ 'ajab jaadū thā

vo sarāpā thā faqat chāñd ke paikar kī tarah

mere hāthoñ kī lakīroñ meñ tirā naam nahīñ

phir bhī DhūñDā hai tujhe miil ke patthar kī tarah

be-hisī aisī ki ehsās se ḳhālī haiñ sabhī

dil hue jaate haiñ is daur meñ patthar kī tarah

vasl kī koī tamanna hai na furqat kā 'azāb

zindagī ham ne guzārī hai qalandar kī tarah

tah meñ dariyā kī mujhe kuchh bhī na mil paayā 'mu'īn'

ġhote ham ne bhī lagā.e the shanāvar kī tarah

jis ko dekha tha kabhi husn ke paikar ki tarah

ab KHayalon mein wahi shaKHs hai manzar ki tarah

rah-e-maqtal se zara KHud ko bacha kar niklo

chashm-e-qatil ki ghazab-naki hai KHanjar ki tarah

us ki maKHmur nigahon mein 'ajab jadu tha

wo sarapa tha faqat chand ke paikar ki tarah

mere hathon ki lakiron mein tera nam nahin

phir bhi DhunDa hai tujhe mil ke patthar ki tarah

be-hisi aisi ki ehsas se KHali hain sabhi

dil hue jate hain is daur mein patthar ki tarah

wasl ki koi tamanna hai na furqat ka 'azab

zindagi hum ne guzari hai qalandar ki tarah

tah mein dariya ki mujhe kuchh bhi na mil paya 'mu'in'

ghote hum ne bhi lagae the shanawar ki tarah