jis ne har bar mere sath bhalai ki hai

jis ne har baar mire saath bhalā.ī kī hai

bas usī shaḳhs kī duniyā ne burā.ī kī hai

'ishq hī dil ke maraz kī hai davā 'ishq karo

in tabīboñ ne ġhalat Dhab se davā.ī kī hai

laakh rañgvā le kaf us kā tū raqīb us ne magar

apne dil par mire chehre kī chhapā.ī kī hai

qābil-e-dīd hai tum dekhte rah jāoge

dil pe kyā tīr-e-mohabbat ne kaḌhā.ī kī hai

kis qadar dil ko diyā maiñ ne bhī bhole-pan meñ

kis qadar us ne bhī āñkhoñ kī safā.ī kī hai

aaj phir chorī se dil paas gayā thā us ke

aaj phir maiñ ne bahut dil kī piTā.ī kī hai

jāntā jo ye zamāna hameñ kartā na alag

muddat-e-jashn-e-mohabbat to judā.ī kī hai

mujh ko bhī degrē milī chāk-garebāñ vaalī

dil ke schōl meñ maiñ ne bhī paḌhā.ī kī hai

maiñ to bas terā huuñ bas terā huuñ bas terā huuñ

tū jo suntā hai to ye chīḳh duhā.ī kī hai

ḳhud rafū-gar ne jigar chaak kiyā 'aḳhtar' kā

ḳhuub ro ro ke phir us ne hī silā.ī kī hai

jis ne har bar mere sath bhalai ki hai

bas usi shaKHs ki duniya ne burai ki hai

'ishq hi dil ke maraz ki hai dawa 'ishq karo

in tabibon ne ghalat Dhab se dawai ki hai

lakh rangwa le kaf us ka tu raqib us ne magar

apne dil par mere chehre ki chhapai ki hai

qabil-e-did hai tum dekhte rah jaoge

dil pe kya tir-e-mohabbat ne kaDhai ki hai

kis qadar dil ko diya main ne bhi bhole-pan mein

kis qadar us ne bhi aankhon ki safai ki hai

aaj phir chori se dil pas gaya tha us ke

aaj phir main ne bahut dil ki piTai ki hai

jaanta jo ye zamana hamein karta na alag

muddat-e-jashn-e-mohabbat to judai ki hai

mujh ko bhi degree mili chaak-gareban wali

dil ke school mein main ne bhi paDhai ki hai

main to bas tera hun bas tera hun bas tera hun

tu jo sunta hai to ye chiKH duhai ki hai

KHud rafu-gar ne jigar chaak kiya 'aKHtar' ka

KHub ro ro ke phir us ne hi silai ki hai