jis se bujhaun pyas wo manzar banae to

jis se bujhā.ūñ pyaas vo manzar banā.e to

kāġhaz pe hī sahī vo samundar banā.e to

chāhūñgā jān-o-dil se use bhī tirī tarah

tujh sā hasīn but koī aazar banā.e to

duniyā ne mere tan ko jakaḌ bhī liyā to kyā

apnī jagah vo dil ke bhī andar banā.e to

vāregī tujh pe jaan hī duniyā hazār baar

ḳhud ko haqīqatan tū qalandar banā.e to

phir zindagī kā asl mazā aa.egā tujhe

ghar apnā mere saath tū mil kar banā.e to

raas aa hī jaa.e ham ko ye shāyad isī tarah

duniyā ko ai ḳhudā tū mukarrar banā.e to

'najmī' agarche qatl use kar sake na ham

jo chal sakeñ havā pe vo ḳhanjar banā.e to

jis se bujhaun pyas wo manzar banae to

kaghaz pe hi sahi wo samundar banae to

chahunga jaan-o-dil se use bhi teri tarah

tujh sa hasin but koi aazar banae to

duniya ne mere tan ko jakaD bhi liya to kya

apni jagah wo dil ke bhi andar banae to

waregi tujh pe jaan hi duniya hazar bar

KHud ko haqiqatan tu qalandar banae to

phir zindagi ka asl maza aaega tujhe

ghar apna mere sath tu mil kar banae to

ras aa hi jae hum ko ye shayad isi tarah

duniya ko ai KHuda tu mukarrar banae to

'najmi' agarche qatl use kar sake na hum

jo chal saken hawa pe wo KHanjar banae to