jis taraf jaun udhar aalam-e-tanhai hai

jis taraf jā.ūñ udhar ālam-e-tanhā.ī hai

jitnā chāhā thā tujhe utnī sazā paa.ī hai

meñ jise dekhnā chāhūñ vo nazar na aa sake

haa.e in āñkhoñ pe kyuuñ tohmat-e-bīnā.ī hai

bārhā sar-kashī o kaj-kulahī ke bā-vasf

tere dar par mujhe daryūza-garī laa.ī hai

sadma-e-hijr meñ tū bhī hai barābar kā sharīk

ye alag baat tujhe tāb-e-shakebā.ī hai

bhūlne vaale ne shāyad ye na sochā hogā

ek do din nahīñ barsoñ kī shanāsā.ī hai

jām-e-ḳhush-rañg tahī hai mujhe ma.alūm na thā

apnī TuuTī huī tauba pe hañsī aa.ī hai

ye tavajjoh bhī tirī husn-e-gurezāñ kī tarah

ye taġhāful bhī mirī hausla-afzā.ī hai

terā lahja hai ki sannāTe ne āñkheñ kholīñ

terī āvāz kalīd-e-dar-e-tanhā.ī hai

'shāz' pūchho ki ye āñkhoñ kā dhuñdlakā kab tak

raat aa.ī nahīñ yā niiñd nahīñ aa.ī hai

jis taraf jaun udhar aalam-e-tanhai hai

jitna chaha tha tujhe utni saza pai hai

mein jise dekhna chahun wo nazar na aa sake

hae in aankhon pe kyun tohmat-e-binai hai

barha sar-kashi o kaj-kulahi ke ba-wasf

tere dar par mujhe daryuza-gari lai hai

sadma-e-hijr mein tu bhi hai barabar ka sharik

ye alag baat tujhe tab-e-shakebai hai

bhulne wale ne shayad ye na socha hoga

ek do din nahin barson ki shanasai hai

jam-e-KHush-rang tahi hai mujhe malum na tha

apni TuTi hui tauba pe hansi aai hai

ye tawajjoh bhi teri husn-e-gurezan ki tarah

ye taghaful bhi meri hausla-afzai hai

tera lahja hai ki sannaTe ne aankhen kholin

teri aawaz kalid-e-dar-e-tanhai hai

'shaz' puchho ki ye aankhon ka dhundlaka kab tak

raat aai nahin ya nind nahin aai hai