jise pala tha ek muddat tak aaghosh-e-tamanna mein

jise paalā thā ik muddat tak āġhosh-e-tamannā meñ

vahī baanī huā mere ġham o dard o aziyyat kā

usī ke haath se kyā kyā sahā sahnā hai kyā kyā kuchh

ilāhī do jahāñ meñ muñh ho kaalā is muravvat kā

kareñ insāf kā daavā asar kuchh bhī na zāhir ho

mazā chakkhā hai aise dostoñ se bhī mohabbat kā

miTā.eñ taaki apne zulm karne kī nadāmat ko

nikāleñ DhūñD kar har tarah se pahlū shikāyat kā

hasad jī meñ bharā hai laag hai ik umr se dil meñ

kareñ zāhir agar mauqā hai iz.hār-e-adāvat kā

tama.a meñ kuchh na samjheñ baap aur bhaa.ī kī hurmat ko

amal dekho to ye phir kuchh kareñ daavā sharāfat kā

mirī umr-e-do-roza bekasī ke saath kaTtī hai

na apnoñ se na ġhairoñ se milā samra riyāzat kā

jise dekhā jise paayā ġharaz kā apnī banda thā

jahāñ maiñ ab mazā baaqī nahīñ ḳhālis mohabbat kā

hamārā kalba-e-ahzāñ hai ham haiñ yā kitābeñ haiñ

rahā baaqī na koī ham-nashīñ ab apnī qismat kā

ḳhudā ābād rakkhe 'shād' mere un azīzoñ ko

mazā chakkhvā diyā al-qarz-o-miqrāz-ul-mohabbat kā

jise pala tha ek muddat tak aaghosh-e-tamanna mein

wahi bani hua mere gham o dard o aziyyat ka

usi ke hath se kya kya saha sahna hai kya kya kuchh

ilahi do jahan mein munh ho kala is murawwat ka

karen insaf ka dawa asar kuchh bhi na zahir ho

maza chakkha hai aise doston se bhi mohabbat ka

miTaen taki apne zulm karne ki nadamat ko

nikalen DhunD kar har tarah se pahlu shikayat ka

hasad ji mein bhara hai lag hai ek umr se dil mein

karen zahir agar mauqa hai izhaar-e-adawat ka

tama mein kuchh na samjhen bap aur bhai ki hurmat ko

amal dekho to ye phir kuchh karen dawa sharafat ka

meri umr-e-do-roza bekasi ke sath kaTti hai

na apnon se na ghairon se mila samra riyazat ka

jise dekha jise paya gharaz ka apni banda tha

jahan main ab maza baqi nahin KHalis mohabbat ka

hamara kalba-e-ahzan hai hum hain ya kitaben hain

raha baqi na koi ham-nashin ab apni qismat ka

KHuda aabaad rakkhe 'shad' mere un azizon ko

maza chakkhwa diya al-qarz-o-miqraaz-ul-mohabbat ka