jise tu KHamushi samjha hai iztirab samajh

jise tū ḳhāmushī samjhā hai iztirāb samajh

maiñ kar rahā huuñ ye tujh se jo ijtināb samajh

hamārā honā na honā agar barābar hai

kisī ko aa.egā kaise tirā hisāb samajh

maiñ achchhā bantā huā dekh nisf rah gayā huuñ

maiñ ab bhī achchhā nahīñ huuñ to le ḳharāb samajh

ḳhirad kī maan ke samjhā thā kuchh haqīqat ko

junūñ ba-zid hai haqīqat ko bhī sarāb samajh

jo terī baat pe kuchh bhī nahīñ kahā maiñ ne

isī ko kaafī samajh le yahī javāb samajh

koī to ḳhvāb meñ aa kar kahe ki mere ho

koī to ḳhvāb sunā.e kahe ki ḳhvāb samajh

ye ḳhush-nasībī har ik ko kahāñ mayassar hai

'saġhīr' saath hai tere to ye savāb samajh

jise tu KHamushi samjha hai iztirab samajh

main kar raha hun ye tujh se jo ijtinab samajh

hamara hona na hona agar barabar hai

kisi ko aaega kaise tera hisab samajh

main achchha banta hua dekh nisf rah gaya hun

main ab bhi achchha nahin hun to le KHarab samajh

KHirad ki man ke samjha tha kuchh haqiqat ko

junun ba-zid hai haqiqat ko bhi sarab samajh

jo teri baat pe kuchh bhi nahin kaha main ne

isi ko kafi samajh le yahi jawab samajh

koi to KHwab mein aa kar kahe ki mere ho

koi to KHwab sunae kahe ki KHwab samajh

ye KHush-nasibi har ek ko kahan mayassar hai

'saghir' sath hai tere to ye sawab samajh