جسے تو خامشی سمجھا ہے اضطراب سمجھ

جسے تو خامشی سمجھا ہے اضطراب سمجھ

میں کر رہا ہوں یہ تجھ سے جو اجتناب سمجھ

ہمارا ہونا نہ ہونا اگر برابر ہے

کسی کو آئے گا کیسے ترا حساب سمجھ

میں اچھا بنتا ہوا دیکھ نصف رہ گیا ہوں

میں اب بھی اچھا نہیں ہوں تو لے خراب سمجھ

خرد کی مان کے سمجھا تھا کچھ حقیقت کو

جنوں بضد ہے حقیقت کو بھی سراب سمجھ

جو تیری بات پہ کچھ بھی نہیں کہا میں نے

اسی کو کافی سمجھ لے یہی جواب سمجھ

کوئی تو خواب میں آ کر کہے کہ میرے ہو

کوئی تو خواب سنائے کہے کہ خواب سمجھ

یہ خوش نصیبی ہر اک کو کہاں میسر ہے

صغیرؔ ساتھ ہے تیرے تو یہ ثواب سمجھ