jism ki ret bhi muTThi se phisal jaegi

jism kī ret bhī muTThī se phisal jā.egī

maut jab ruuh liye ghar se nikal jā.egī

sub.h aa.egī janāze meñ liye sūraj ko

yād-e-māzī meñ agar raat pighal jā.egī

ag ke bas meñ nahīñ apnī hifāzat karnā

to faqat mom jalā aag bhī jal jā.egī

ḳhāna-e-dil meñ basī chashm-e-lahū māñgeñ hai

sochtā thā ki khilaune se bahal jā.egī

shaam jab lauT ga.ī chhoḌ ke tanhā tujh ko

tā mujhe chhoḌ ke ab raat bhī Dhal jā.egī

ashk niklegā dhuāñ ban ke isī mahfil se

sham.a jab kuud ke us aag meñ jal jā.egī

paañv phislā to giregī vo kisī daldal meñ

zindagī maut nahīñ hai ki sambhal jā.egī

jism ki ret bhi muTThi se phisal jaegi

maut jab ruh liye ghar se nikal jaegi

subh aaegi janaze mein liye suraj ko

yaad-e-mazi mein agar raat pighal jaegi

ag ke bas mein nahin apni hifazat karna

to faqat mom jala aag bhi jal jaegi

KHana-e-dil mein basi chashm-e-lahu mangen hai

sochta tha ki khilaune se bahal jaegi

sham jab lauT gai chhoD ke tanha tujh ko

ta mujhe chhoD ke ab raat bhi Dhal jaegi

ashk niklega dhuan ban ke isi mahfil se

shama jab kud ke us aag mein jal jaegi

panw phisla to giregi wo kisi daldal mein

zindagi maut nahin hai ki sambhal jaegi