جو آپ آئیں تو آنگن میں روشنی ہوگی

جو آپ آئیں تو آنگن میں روشنی ہوگی

خموشیوں میں محبت کی بانسری ہوگی

چمن نے بھیج دیا ہے پیام پھولوں کو

ہوا بھی آج دریچے میں کاسنی ہوگی

کسے خبر تھی کہ نکلے جو آج جنت سے

غبار زیست میں اس درجہ نیستی ہوگی

رکوں گی اور گھڑی بھر یہیں پہ رستے میں

وہ کہہ گیا تھا بہت جلد واپسی ہوگی

جو ہم کلام کبھی ہو تو جان لو گے اسے

وہ خوش مزاج ہے لہجے میں چاشنی ہوگی

وہ میری آنکھ میں اترا ہے خواب کی صورت

تو اس کی آنکھ مجھے بھی تو دیکھتی ہوگی

بنا رہے ہیں جسے آپ دل کا افسانہ

مرا خیال ہے نیلمؔ کی دل لگی ہوگی