jo apne nam nae aaftab likhte hain

jo apne naam na.e āftāb likhte haiñ

vo sirf mere muqaddar meñ ḳhvāb likhte haiñ

hamārī tishna-labī par na jā ki ham aksar

samundaroñ ko bhī jū-e-kam-āb likhte haiñ

kuchh aise log bhī shāmil haiñ haq-parastoñ meñ

jo kor-zehn ko 'ālī-janāb likhte haiñ

tumhāre naam se mansūb hai har ek varaq

ham apne dil kī ik aisī kitāb likhte haiñ

zarūr vo bhī haiñ mahrūm-e-sarḳhushī-e-hayāt

jo log aab ko paiham sarāb likhte haiñ

vo log ruuh kī vīrāniyoñ ko kyā samjheñ

jo ḳhushk jhiil ko chashm-e-pur-āb likhte haiñ

hamāre dost bhī kyā chiiz haiñ ki ghar baiThe

ḳhud apne naam har ik inqalāb likhte haiñ

ham aise dard-mizājoñ kā pūchhnā kyā hai

sukūn-e-dil ko bhī ham iztirāb likhte haiñ

hamārī tishna-labī par na jaao ai 'unvāñ'

ham apne ḳhūn-e-jigar ko sharāb likhte haiñ

jo apne nam nae aaftab likhte hain

wo sirf mere muqaddar mein KHwab likhte hain

hamari tishna-labi par na ja ki hum aksar

samundaron ko bhi ju-e-kam-ab likhte hain

kuchh aise log bhi shamil hain haq-paraston mein

jo kor-zehn ko 'ali-janab likhte hain

tumhaare nam se mansub hai har ek waraq

hum apne dil ki ek aisi kitab likhte hain

zarur wo bhi hain mahrum-e-sarKHushi-e-hayat

jo log aab ko paiham sarab likhte hain

wo log ruh ki viraniyon ko kya samjhen

jo KHushk jhil ko chashm-e-pur-ab likhte hain

hamare dost bhi kya chiz hain ki ghar baiThe

KHud apne nam har ek inqalab likhte hain

hum aise dard-mizajon ka puchhna kya hai

sukun-e-dil ko bhi hum iztirab likhte hain

hamari tishna-labi par na jao ai 'unwan'

hum apne KHun-e-jigar ko sharab likhte hain