jo chiDiya mere ghar aa ja rahi thi

jo chiḌiyā mere ghar aa jā rahī thī

tumhāre ghar se tinke lā rahī thī

badan us kā bhī gūñgā ho gayā thā

hamārī bhī nazar haklā rahī thī

havā ne kyoñ bujhāyā thā diye ko

tirī ḳhushbū mujhe samjhā rahī thī

mirī āvāz pe qabza jamā kar

zarūrat jhūTh bole jā rahī thī

'ibādat ke darīche khul ga.e the

mohabbat aa rahī thī jā rahī thī

kahā sīrat ne us kī nazm likkho

magar sūrat ġhazal likhvā rahī thī

bhañvar se bachne meñ kashtī hamārī

magarmachhoñ meñ ghirtī jā rahī thī

musalsal bechnā paḌtī thiiñ ḳhushiyāñ

ġhamoñ par itnī lāgat aa rahī thī

jo chiDiya mere ghar aa ja rahi thi

tumhaare ghar se tinke la rahi thi

badan us ka bhi gunga ho gaya tha

hamari bhi nazar hakla rahi thi

hawa ne kyon bujhaya tha diye ko

teri KHushbu mujhe samjha rahi thi

meri aawaz pe qabza jama kar

zarurat jhuTh bole ja rahi thi

'ibaadat ke dariche khul gae the

mohabbat aa rahi thi ja rahi thi

kaha sirat ne us ki nazm likkho

magar surat ghazal likhwa rahi thi

bhanwar se bachne mein kashti hamari

magarmachhon mein ghirti ja rahi thi

musalsal bechna paDti thin KHushiyan

ghamon par itni lagat aa rahi thi