jo guzre jaan se to paya-e-takmil tak pahunche

jo guzre jaan se to pāya-e-takmīl tak pahuñche

nahīñ mumkin ki koī ziist kī tafsīl tak pahuñche

rahe abjad ke chakkar hī meñ jo the fikr se aarī

hue fāzil vahī jo zauq kī takmīl tak pahuñche

rahe bartar jahāñ meñ diin ke jab tak rahe shaidā

hue jab diin se ġhāfil to ham tazlīl tak pahuñche

pahuñchtā hai dalā.el se to insāñ bad natīje par

zarā sī baat thī kyoñ us kī tum tāvīl tak pahuñche

tū apnī zindagī meñ ḳhud ko pahuñchā aisī ḳhūbī tak

zamāna ho tirā joyā tirī tamsīl tak pahuñche

rasā.ī jin kī thī sarkār-e-sharq-o-ġharb ke dar tak

vo sham.a-e-dīn ko le kar hazāroñ miil tak pahuñche

bahut se naujavāñ ghuum aa.e landan aur paris tak

koī mard-e-jarī ausāf-e-ismā.īl tak pahuñche

zamīn-e-sher kī ārā.ishoñ hī tak na rakh matlab

taḳhayyul hai vahī jo halqa-e-jibrīl tak pahuñche

qavāfī chand dām-e-fikr tak pahuñche the ai 'sā.ir'

ye alfāz-e-hasīñ ash.ār kī tashkīl tak pahuñche

jo guzre jaan se to paya-e-takmil tak pahunche

nahin mumkin ki koi zist ki tafsil tak pahunche

rahe abjad ke chakkar hi mein jo the fikr se aari

hue fazil wahi jo zauq ki takmil tak pahunche

rahe bartar jahan mein din ke jab tak rahe shaida

hue jab din se ghafil to hum tazlil tak pahunche

pahunchta hai dalael se to insan bad natije par

zara si baat thi kyon us ki tum tawil tak pahunche

tu apni zindagi mein KHud ko pahuncha aisi KHubi tak

zamana ho tera joya teri tamsil tak pahunche

rasai jin ki thi sarkar-e-sharq-o-gharb ke dar tak

wo shama-e-din ko le kar hazaron mil tak pahunche

bahut se naujawan ghum aae landan aur paris tak

koi mard-e-jari ausaf-e-ismail tak pahunche

zamin-e-sher ki aaraishon hi tak na rakh matlab

taKHayyul hai wahi jo halqa-e-jibril tak pahunche

qawafi chand dam-e-fikr tak pahunche the ai 'sair'

ye alfaz-e-hasin ashaar ki tashkil tak pahunche