jo haalat ab hai is dil ki ye haalat phir kahan hogi

jo hālat ab hai is dil kī ye hālat phir kahāñ hogī

ġhazal kah leñ idhar maa.il tabī.at phir kahāñ hogī

milā hai ab jo ġham mujh ko rahegā umr bhar dil meñ

jo shiddat aaj hai is meñ vo shiddat phir kahāñ hogī

abhī ik dūsre ko dekh leñ donoñ nazar bhar ke

bichhaḌne kā hai vaqt aayā ye qurbat phir kahāñ hogī

mileñge phir ye kahte ho kabhī vāpas jo aa.e to

kahāñ aise miloge tum ye sūrat phir kahāñ hogī

judā ho kar bhī tujh se zindagī ai dost guzregī

bahar-sūrat magar ye ḳhūbsūrat phir kahāñ hogī

shikāyat thī tumheñ ham se hameñ bhī tum se shikva thā

kareñge kis se phir shikva shikāyat phir kahāñ hogī

chaleñ 'mas.ūd' hāl-e-dil ab un se apnā kah deñ ham

milegī phir kise fursat ye jur.at phir kahāñ hogī

jo haalat ab hai is dil ki ye haalat phir kahan hogi

ghazal kah len idhar mail tabiat phir kahan hogi

mila hai ab jo gham mujh ko rahega umr bhar dil mein

jo shiddat aaj hai is mein wo shiddat phir kahan hogi

abhi ek dusre ko dekh len donon nazar bhar ke

bichhaDne ka hai waqt aaya ye qurbat phir kahan hogi

milenge phir ye kahte ho kabhi wapas jo aae to

kahan aise miloge tum ye surat phir kahan hogi

juda ho kar bhi tujh se zindagi ai dost guzregi

bahar-surat magar ye KHubsurat phir kahan hogi

shikayat thi tumhein hum se hamein bhi tum se shikwa tha

karenge kis se phir shikwa shikayat phir kahan hogi

chalen 'masud' haal-e-dil ab un se apna kah den hum

milegi phir kise fursat ye jurat phir kahan hogi