جو حالت اب ہے اس دل کی یہ حالت پھر کہاں ہوگی

جو حالت اب ہے اس دل کی یہ حالت پھر کہاں ہوگی

غزل کہہ لیں ادھر مائل طبیعت پھر کہاں ہوگی

ملا ہے اب جو غم مجھ کو رہے گا عمر بھر دل میں

جو شدت آج ہے اس میں وہ شدت پھر کہاں ہوگی

ابھی اک دوسرے کو دیکھ لیں دونوں نظر بھر کے

بچھڑنے کا ہے وقت آیا یہ قربت پھر کہاں ہوگی

ملیں گے پھر یہ کہتے ہو کبھی واپس جو آئے تو

کہاں ایسے ملو گے تم یہ صورت پھر کہاں ہوگی

جدا ہو کر بھی تجھ سے زندگی اے دوست گزرے گی

بہر صورت مگر یہ خوب صورت پھر کہاں ہوگی

شکایت تھی تمہیں ہم سے ہمیں بھی تم سے شکوہ تھا

کریں گے کس سے پھر شکوہ شکایت پھر کہاں ہوگی

چلیں مسعودؔ حال دل اب ان سے اپنا کہہ دیں ہم

ملے گی پھر کسے فرصت یہ جرأت پھر کہاں ہوگی