jo ho sake to kabhi itni mehrbani kar

jo ho sake to kabhī itnī mehrbānī kar

uḌā ke ḳhaak mirī mujh ko āsmānī kar

phir us ke ba.ad ḳhudā jaane kab mayassar hoñ

ye chand lamhe mohabbat ke jāvedānī kar

ba-zor-e-teġh hukūmat kiyā nahīñ karte

jo ho sake to diloñ par bhī hukmarānī kar

ai raushnī ke payambar ki ai naqīb-e-nūr

lahū se apne charāġhoñ kī pāsbānī kar

maiñ aa.ina huuñ na utre kahīñ tirā chehra

na apne aap pe itrā na lan-tarānī kar

maiñ chal paḌā huuñ qadam se qadam milā mere

rafāqatoñ ke safar meñ na ānā-kānī kar

hamāre lams se paḌtī hai jaan murdoñ meñ

hamāre haath pe bai.at ai zindagānī kar

na maslahat kī tarāzū meñ taul lafzoñ ko

jo dil kahe vahī hoñToñ se tarjumānī kar

na yaad kar unheñ aasif vo pal jo biit ga.e

yahīñ pe dard-bharī ḳhatm vo kahānī kar

jo ho sake to kabhi itni mehrbani kar

uDa ke KHak meri mujh ko aasmani kar

phir us ke baad KHuda jaane kab mayassar hon

ye chand lamhe mohabbat ke jawedani kar

ba-zor-e-tegh hukumat kiya nahin karte

jo ho sake to dilon par bhi hukmarani kar

ai raushni ke payambar ki ai naqib-e-nur

lahu se apne charaghon ki pasbani kar

main aaina hun na utre kahin tera chehra

na apne aap pe itra na lan-tarani kar

main chal paDa hun qadam se qadam mila mere

rafaqaton ke safar mein na aana-kani kar

hamare lams se paDti hai jaan murdon mein

hamare hath pe baiat ai zindagani kar

na maslahat ki taraazu mein taul lafzon ko

jo dil kahe wahi honTon se tarjumani kar

na yaad kar unhen aasif wo pal jo bit gae

yahin pe dard-bhari KHatm wo kahani kar