jo KHwab mujhe halqa-e-sad-KHwab mein laya

jo ḳhvāb mujhe halqa-e-sad-ḳhvāb meñ laayā

tasvīr banā maiñ use ahbāb meñ laayā

ik lafz mujhe jāda-e-shamshīr huā thā

vo lafz mujhe qarya-e-shādāb meñ laayā

lā-yā'nī-o-be-mā'nī thī kal tak mirī hastī

ik shaḳhs mujhe ḳhāna-e-e'rāb meñ laayā

āñkhoñ se Tapakne lagā ā.īna-e-sayyāl

kal raat jo ik 'aks vo mahtāb meñ laayā

be-harf huī jab kabhī dīvār-e-navishta

maiñ anjum-e-shab-tāb ko mehrāb meñ laayā

vo mehr pe aayā bhī to ham tishna-labāñ tak

ik mauj-e-ajal shīsha-e-talḳhāb meñ laayā

sho'la sā lapaktā thā sar-e-bazm jo 'at.har'

maiñ khīñch ke us ko dil-e-betāb meñ laayā

jo KHwab mujhe halqa-e-sad-KHwab mein laya

taswir bana main use ahbab mein laya

ek lafz mujhe jada-e-shamshir hua tha

wo lafz mujhe qarya-e-shadab mein laya

la-ya'ni-o-be-ma'ni thi kal tak meri hasti

ek shaKHs mujhe KHana-e-e'rab mein laya

aankhon se Tapakne laga aaina-e-sayyal

kal raat jo ek 'aks wo mahtab mein laya

be-harf hui jab kabhi diwar-e-nawishta

main anjum-e-shab-tab ko mehrab mein laya

wo mehr pe aaya bhi to hum tishna-laban tak

ek mauj-e-ajal shisha-e-talKHab mein laya

sho'la sa lapakta tha sar-e-bazm jo 'athar'

main khinch ke us ko dil-e-betab mein laya