جو خواب مجھے حلقۂ صد خواب میں لایا

جو خواب مجھے حلقۂ صد خواب میں لایا

تصویر بنا میں اسے احباب میں لایا

اک لفظ مجھے جادۂ شمشیر ہوا تھا

وہ لفظ مجھے قریۂ شاداب میں لایا

لا یعنی و بے معنی تھی کل تک مری ہستی

اک شخص مجھے خانۂ اعراب میں لایا

آنکھوں سے ٹپکنے لگا آئینۂ سیال

کل رات جو اک عکس وہ مہتاب میں لایا

بے حرف ہوئی جب کبھی دیوار نوشتہ

میں انجم شب تاب کو محراب میں لایا

وہ مہر پہ آیا بھی تو ہم تشنہ‌ لباں تک

اک موج اجل شیشۂ تلخاب میں لایا

شعلہ سا لپکتا تھا سر بزم جو اطہرؔ

میں کھینچ کے اس کو دل بیتاب میں لایا