jo kuchh bhi mere pas tha khona paDa mujhe

jo kuchh bhī mere paas thā khonā paḌā mujhe

zaḳhmoñ meñ nashtaroñ ko chubhonā paḌā mujhe

terī taraf se jab koī tohfa na mil sakā

ashkoñ ke motiyoñ ko pironā paḌā mujhe

ai jān-e-jāñ tire liye kyā kyā na kar ga.ī

maiñ bevafā nahīñ thī pe honā paḌā mujhe

tū ne diye jo dard kabhī miT nahīñ sake

har daaġh āñsuoñ se hī dhonā paḌā mujhe

tū bhī mirī pasand thā merā nasīb thā

ye baat soch soch ke ronā paḌā mujhe

maiñ 'prīt' us ke hijr meñ jaltī rahī sadā

kāñToñ kī sej thī jahāñ sonā paḌā mujhe

jo kuchh bhi mere pas tha khona paDa mujhe

zaKHmon mein nashtaron ko chubhona paDa mujhe

teri taraf se jab koi tohfa na mil saka

ashkon ke motiyon ko pirona paDa mujhe

ai jaan-e-jaan tere liye kya kya na kar gai

main bewafa nahin thi pe hona paDa mujhe

tu ne diye jo dard kabhi miT nahin sake

har dagh aansuon se hi dhona paDa mujhe

tu bhi meri pasand tha mera nasib tha

ye baat soch soch ke rona paDa mujhe

main 'prit' us ke hijr mein jalti rahi sada

kanTon ki sej thi jahan sona paDa mujhe