jo mahv-e-hālāt nahīñ hai
aisī koī zaat nahīñ hai
tum ne milā kar pher liiñ nazreñ
jaao koī baat nahīñ hai
husn samajh le ishq kī manzil
itnī ma.alūmāt nahīñ hai
sūraj ubhre chāhe Duube
un ke jahāñ meñ raat nahīñ hai
mere hī dil ne mujh ko miTāyā
is meñ kisī kā haat nahīñ hai
bikhre hue haiñ un ke gesū
raat na kahiye raat nahīñ hai
kaliyāñ tak chun letā hai gulchīñ
āgāh-e-jazbāt nahīñ hai
ashkoñ pe mere hañsne vaale
phūloñ kī barsāt nahīñ hai
tark-e-vafā tauhīn-e-vafā hai
merī un kī baat nahīñ hai
bhiig chukā un kā phir dāman
aur abhī barsāt nahīñ hai
un se bichhaḌ kar bhī ḳhush ḳhush huuñ
jaise koī baat nahīñ hai
kaun sā merā ashk-e-nadāmat
ā.ina-e-jazbāt nahīñ hai
'sājid' ahl-e-dil ne batāyā
aam hamārī baat nahīñ hai
jo mahw-e-haalat nahin hai
aisi koi zat nahin hai
tum ne mila kar pher lin nazren
jao koi baat nahin hai
husn samajh le ishq ki manzil
itni malumat nahin hai
suraj ubhre chahe Dube
un ke jahan mein raat nahin hai
mere hi dil ne mujh ko miTaya
is mein kisi ka hat nahin hai
bikhre hue hain un ke gesu
raat na kahiye raat nahin hai
kaliyan tak chun leta hai gulchin
aagah-e-jazbaat nahin hai
ashkon pe mere hansne wale
phulon ki barsat nahin hai
tark-e-wafa tauhin-e-wafa hai
meri un ki baat nahin hai
bhig chuka un ka phir daman
aur abhi barsat nahin hai
un se bichhaD kar bhi KHush KHush hun
jaise koi baat nahin hai
kaun sa mera ashk-e-nadamat
aaina-e-jazbaat nahin hai
'sajid' ahl-e-dil ne bataya
aam hamari baat nahin hai
Source:
Aaina-e-Ghazal (Pg. 82)
-
Author:
Sajid Siddiqi lakhnavi
-
- Edition: 1973
- Publisher: Sajid Siddiqi lakhnavi
- Year of Publication: 1973
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
