جو مہرباں کہیں وہ رشک ماہ ہو جاوے

جو مہرباں کہیں وہ رشک ماہ ہو جاوے

تو یہ گدا بھی کبھی بادشاہ ہو جاوے

جو اپنی شعلہ فگن برق آہ ہو جاوے

تو کاخ چرخ بھی جل کر تباہ ہو جاوے

دو چار گر مری ان کی نگاہ ہو جاوے

تو سب معاملہ پھر رو براہ ہو جاوے

کریں سفید بھی گھر کو مرے اگر معمار

تو دود آہ سے فوراً سیاہ ہو جاوے

شب وصال کی آتی ہیں یاد یوں باتیں

کہ خواب میں کوئی جیوں بادشاہ ہو جاوے

جو جاؤں آج کی شب ان کی بزم میں تنہا

تو مجھ پہ غیر کا کاش اشتباہ ہو جاوے

یہی دعا ہے کہ انجام ہو بخیر مرا

خدا کرے کہ بتوں سے نباہ ہو جاوے

نگاہ لطف جو غیروں پہ ہے تو بہتر ہے

کبھی ادھر بھی کرم کی نگاہ ہو جاوے

ترے عتاب کی لذت سے یہ تمنا ہے

کہ آج بھی کوئی مجھ سے گناہ ہو جاوے

زمانہ تم پہ ہے غش کیا عجب جو حشر کے دن

مرا گواہ تمہارا گواہ ہو جاوے

ملے بھی حور جو زاہد کو خلد میں جا کر

مزا ہو واں جو اسے ضعف باہ ہو جاوے

نکالو سحرؔ وہ مضمون طبع عالی سے

جہاں میں جس کے سبب واہ واہ ہو جاوے