jo na gulshan na gulabon se nikal kar aae

jo na gulshan na gulāboñ se nikal kar aa.e

vo to ḳhushbū hai jo ḳhvāboñ se nikal kar aa.e

itnī rangīñ to nahīñ hotī qabā kyā hogā

gar mirā chāñd sahāboñ se nikal kar aa.e

ġham ke taare bhī bujhe jaate haiñ us se kah do

sūrat-e-sub.h hijāboñ se nikal kar aa.e

zindagī ab to tirā shahr-e-haqā.eq ye kahe

koī sahrā na sarāboñ se nikal kar aa.e

kabhī vo bhī to sanā-ḳhvāñ ho ki jis kī ḳhātir

itne ḳhūñrez azāboñ se nikal kar aa.e

jab koī lafz tire pyaar ke qābil na milā

koī ma.anī na kitāboñ se nikal kar aa.e

jo na gulshan na gulabon se nikal kar aae

wo to KHushbu hai jo KHwabon se nikal kar aae

itni rangin to nahin hoti qaba kya hoga

gar mera chand sahabon se nikal kar aae

gham ke tare bhi bujhe jate hain us se kah do

surat-e-subh hijabon se nikal kar aae

zindagi ab to tera shahr-e-haqaeq ye kahe

koi sahra na sarabon se nikal kar aae

kabhi wo bhi to sana-KHwan ho ki jis ki KHatir

itne KHunrez azabon se nikal kar aae

jab koi lafz tere pyar ke qabil na mila

koi mani na kitabon se nikal kar aae