jo rang chaDha dil pe mere tez bahut hai

jo rang chaḌhā dil pe mire tez bahut hai

ab ke jo huā 'ishq junūñ-ḳhez bahut hai

kyā jāniye kis taur se dekhā hai kisī ne

dil meñ jo uThī mauj tarab-ḳhez bahut hai

vāfar hai muqaddar meñ mire dard kī daulat

kuchh yuuñ bhī mirī chashm guhar-rez bahut hai

baḳhshe haiñ ise 'ishq ne riqqat ke ḳhazāne

paimāna mire dil kā jo labrez bahut hai

kyā baat baḌhe kam-suḳhanī ham ko bhī lāhaq

aur is pe vo dil-dār kam-āmez bahut hai

'nasrīn' rahe Dor ta'alluq kī ye qaa.em

ye silsila-e-rabt dil-āvez bahut hai

jo rang chaDha dil pe mere tez bahut hai

ab ke jo hua 'ishq junun-KHez bahut hai

kya jaaniye kis taur se dekha hai kisi ne

dil mein jo uThi mauj tarab-KHez bahut hai

wafar hai muqaddar mein mere dard ki daulat

kuchh yun bhi meri chashm guhar-rez bahut hai

baKHshe hain ise 'ishq ne riqqat ke KHazane

paimana mere dil ka jo labrez bahut hai

kya baat baDhe kam-suKHani hum ko bhi lahaq

aur is pe wo dil-dar kam-amez bahut hai

'nasrin' rahe Dor ta'alluq ki ye qaem

ye silsila-e-rabt dil-awez bahut hai