jo ruKH pe uske nukta-e-kamal tha

jo ruḳh pe us ke nukta-e-kamāl thā

thā ḳhaal us ke husn par jo daal thā

kuchh aur hī mu'āmla thā 'ishq meñ

jise thā samjhā dard indimāl thā

banā diyā thā jis ne aa.ina mujhe

thā bā-hunar vo shaḳhs bā-kamāl thā

muhīt sadiyoñ par thā hijr kā vo pal

bas ek lamha 'arsa-e-visāl thā

milā rahā hai ab jo haañ meñ haañ tirī

kabhī vo shaḳhs merā ham-ḳhayāl thā

girā diyā nazar se tum ne jis ghaḌī

ye dil kahāñ thā barg-e-pā.emāl thā

na jaane kyoñ yaqīñ kī Dor toḌ dī

na jaane tum ko kaisā ehtimāl thā

nahīñ guzar bhī us kā ab ḳhayāl meñ

kabhī jo merā markaz-e-ḳhayāl thā

palak jhapak sake na us ke rū-ba-rū

thī hairateñ ki varta-e-jamāl thā

kahāñ hai 'nasrīñ' pahle jaisī baat ab

na jā sakā jo aa.ine meñ baal thā

jo ruKH pe us ke nukta-e-kamal tha

tha KHal us ke husn par jo dal tha

kuchh aur hi mu'amla tha 'ishq mein

jise tha samjha dard indimal tha

bana diya tha jis ne aaina mujhe

tha ba-hunar wo shaKHs ba-kamal tha

muhit sadiyon par tha hijr ka wo pal

bas ek lamha 'arsa-e-visal tha

mila raha hai ab jo han mein han teri

kabhi wo shaKHs mera ham-KHayal tha

gira diya nazar se tum ne jis ghaDi

ye dil kahan tha barg-e-paemal tha

na jaane kyon yaqin ki Dor toD di

na jaane tum ko kaisa ehtimal tha

nahin guzar bhi us ka ab KHayal mein

kabhi jo mera markaz-e-KHayal tha

palak jhapak sake na us ke ru-ba-ru

thi hairaten ki warta-e-jamal tha

kahan hai 'nasrin' pahle jaisi baat ab

na ja saka jo aaine mein baal tha