jo samjhate bhi aa kar waiz-e-barham to kya karte

jo samjhāte bhī aa kar vā.iz-e-barham to kyā karte

ham is duniyā ke aage us jahāñ kā ġham to kyā karte

haram se mai-kade tak manzil-e-yak-umr thī saaqī

sahārā gar na detī laġhzish-e-paiham to kyā karte

jo miTTī ko mizāj-e-gul atā kar deñ vo ai vaa.iz

zamīñ se duur fikr-e-jannat-e-ādam to kyā karte

savāl un kā javāb un kā sukūt un kā ḳhitāb un kā

ham un kī anjuman meñ sar na karte ḳham to kyā karte

jahāñ 'majrūh' dil ke hausle TūTeñ nigāhoñ se

vahāñ karte bhī marg-e-shauq kā mātam to kyā karte

jo samjhate bhi aa kar waiz-e-barham to kya karte

hum is duniya ke aage us jahan ka gham to kya karte

haram se mai-kade tak manzil-e-yak-umr thi saqi

sahaara gar na deti laghzish-e-paiham to kya karte

jo miTTi ko mizaj-e-gul ata kar den wo ai waiz

zamin se dur fikr-e-jannat-e-adam to kya karte

sawal un ka jawab un ka sukut un ka KHitab un ka

hum un ki anjuman mein sar na karte KHam to kya karte

jahan 'majruh' dil ke hausle TuTen nigahon se

wahan karte bhi marg-e-shauq ka matam to kya karte