jo teri nigah-e-karam uThi to faza ke rang badal gae

jo tirī nigāh-e-karam uThī to fazā ke rang badal ga.e

ki baġhair bāda-o-jām bhī ka.ī daur bazm meñ chal ga.e

tirī bazm-e-kaif-o-surūr kā thā asar bhī sab pe judā judā

jo bahak ga.e vo bahak ga.e jo sañbhal ga.e vo sañbhal ga.e

vo tirā taġhāful-e-be-amāñ ye mirā tavakkul-e-be-karāñ

ki mu'āmalāt-e-nigāh-o-dil ġham-e-sub.h-o-shām meñ Dhal ga.e

ġham-e-rozgār ġham-e-jahāñ ġham-e-zindagī ġham-e-dostāñ

tirī yaad phir tirī yaad thī ki har ik se bach ke nikal ga.e

ye jo tere bāda-parast haiñ ye 'ajīb tarh ke mast haiñ

kabhī be-piye hī bahak ga.e kabhī pī ke aur sañbhal ga.e

vahī anjuman ki jahāñ fareb-e-umīd-o-yās kā hai chalan

usī anjuman meñ 'sirāj' ham kabhī bujh ga.e kabhī jal ga.e

jo teri nigah-e-karam uThi to faza ke rang badal gae

ki baghair baada-o-jam bhi kai daur bazm mein chal gae

teri bazm-e-kaif-o-surur ka tha asar bhi sab pe juda juda

jo bahak gae wo bahak gae jo sanbhal gae wo sanbhal gae

wo tera taghaful-e-be-aman ye mera tawakkul-e-be-karan

ki mu'amalat-e-nigah-o-dil gham-e-subh-o-sham mein Dhal gae

gham-e-rozgar gham-e-jahan gham-e-zindagi gham-e-dostan

teri yaad phir teri yaad thi ki har ek se bach ke nikal gae

ye jo tere baada-parast hain ye 'ajib tarh ke mast hain

kabhi be-piye hi bahak gae kabhi pi ke aur sanbhal gae

wahi anjuman ki jahan fareb-e-umid-o-yas ka hai chalan

usi anjuman mein 'siraj' hum kabhi bujh gae kabhi jal gae