جو تری نگاہ کرم اٹھی تو فضا کے رنگ بدل گئے

جو تری نگاہ کرم اٹھی تو فضا کے رنگ بدل گئے

کہ بغیر بادہ و جام بھی کئی دور بزم میں چل گئے

تری بزم کیف و سرور کا تھا اثر بھی سب پہ جدا جدا

جو بہک گئے وہ بہک گئے جو سنبھل گئے وہ سنبھل گئے

وہ ترا تغافل بے اماں یہ مرا توکل بے کراں

کہ معاملات نگاہ و دل غم صبح و شام میں ڈھل گئے

غم روزگار غم جہاں غم زندگی غم دوستاں

تری یاد پھر تری یاد تھی کہ ہر اک سے بچ کے نکل گئے

یہ جو تیرے بادہ پرست ہیں یہ عجیب طرح کے مست ہیں

کبھی بے پیے ہی بہک گئے کبھی پی کے اور سنبھل گئے

وہی انجمن کہ جہاں فریب امید و یاس کا ہے چلن

اسی انجمن میں سراجؔ ہم کبھی بجھ گئے کبھی جل گئے