josh-e-parwaz mein raftar kahan dekhte hain

josh-e-parvāz meñ raftār kahāñ dekhte haiñ

ham falak sābit-o-sayyār kahāñ dekhte haiñ

jab kareñ 'azm-e-safar rahtī hai manzil pe nazar

ye qadam raah kī dīvār kahāñ dekhte haiñ

be-niyāzī kī shikāyat pe jo karte haiñ gila

vo shikāyat meñ chhupā pyaar kahāñ dekhte haiñ

dekh to leñ unheñ māne' hai magar ro'b-e-jamāl

ho ke hotā nahīñ dīdār kahāñ dekhte haiñ

ḳhvāb-e-ḳhargosh meñ haiñ jo haiñ basīrat se tahī

ho bhī jaa.eñ jo vo bedār kahāñ dekhte haiñ

aañkh rahtī hai jhukī vaqt-e-takallum un kī

ham bhī un ko dam-e-guftār kahāñ dekhte haiñ

diid ho jaa.e bhī un kī jo sar-e-rāh to ham

kab nazar bhar ke lagātār kahāñ dekhte haiñ

tālib-e-jins-e-vafā haiñ jo ḳharīdār yahāñ

laakh ho garmī-e-bāzār kahāñ dekhte haiñ

chal nikalte haiñ jo manzil kī talab meñ 'nasrīñ'

rāste kitne haiñ dushvār kahāñ dekhte haiñ

josh-e-parwaz mein raftar kahan dekhte hain

hum falak sabit-o-sayyar kahan dekhte hain

jab karen 'azm-e-safar rahti hai manzil pe nazar

ye qadam rah ki diwar kahan dekhte hain

be-niyazi ki shikayat pe jo karte hain gila

wo shikayat mein chhupa pyar kahan dekhte hain

dekh to len unhen mane' hai magar ro'b-e-jamal

ho ke hota nahin didar kahan dekhte hain

KHwab-e-KHargosh mein hain jo hain basirat se tahi

ho bhi jaen jo wo bedar kahan dekhte hain

aankh rahti hai jhuki waqt-e-takallum un ki

hum bhi un ko dam-e-guftar kahan dekhte hain

did ho jae bhi un ki jo sar-e-rah to hum

kab nazar bhar ke lagatar kahan dekhte hain

talib-e-jins-e-wafa hain jo KHaridar yahan

lakh ho garmi-e-bazar kahan dekhte hain

chal nikalte hain jo manzil ki talab mein 'nasrin'

raste kitne hain dushwar kahan dekhte hain