جوش پرواز میں رفتار کہاں دیکھتے ہیں

جوش پرواز میں رفتار کہاں دیکھتے ہیں

ہم فلک ثابت و سیار کہاں دیکھتے ہیں

جب کریں عزم سفر رہتی ہے منزل پہ نظر

یہ قدم راہ کی دیوار کہاں دیکھتے ہیں

بے نیازی کی شکایت پہ جو کرتے ہیں گلہ

وہ شکایت میں چھپا پیار کہاں دیکھتے ہیں

دیکھ تو لیں انہیں مانع ہے مگر رعب جمال

ہو کے ہوتا نہیں دیدار کہاں دیکھتے ہیں

خواب خرگوش میں ہیں جو ہیں بصیرت سے تہی

ہو بھی جائیں جو وہ بیدار کہاں دیکھتے ہیں

آنکھ رہتی ہے جھکی وقت تکلم ان کی

ہم بھی ان کو دم گفتار کہاں دیکھتے ہیں

دید ہو جائے بھی ان کی جو سر راہ تو ہم

کب نظر بھر کے لگاتار کہاں دیکھتے ہیں

طالب جنس وفا ہیں جو خریدار یہاں

لاکھ ہو گرمئ بازار کہاں دیکھتے ہیں

چل نکلتے ہیں جو منزل کی طلب میں نسریںؔ

راستے کتنے ہیں دشوار کہاں دیکھتے ہیں