josh par apni mastiyan aain

josh par apnī mastiyāñ aa.iiñ

yaad kis kī ye shoḳhiyāñ aa.iiñ

bātoñ bātoñ meñ le liyā dil ko

tumheñ kyūñ-kar ye phurtiyāñ aa.iiñ

kahīñ un ko na yaad aayā huuñ

aaj kyuuñ mujh ko hichkiyāñ aa.iiñ

donoñ aalam hue tah-o-bālā

un ko kyuuñ ḳhush-ḳhirāmiyāñ aa.iiñ

ruk rahā dam jo aa ke āñkhoñ meñ

yaad kis but kī añkhḌiyāñ aa.iiñ

baal khole nahā rahe the vo

kyā hī ghir ghir ke badliyāñ aa.iiñ

tum jo so.e to talve sahlāne

merī āñkhoñ kī putliyāñ aa.iiñ

phir lagāte ho mehñdī hāthoñ meñ

yaad phir rañg-reliyāñ aa.iiñ

josh-e-vahshat ke din phir aa pahuñche

muzhda ai dil ki beḌiyāñ aa.iiñ

paḌ gayā haath jab garebāñ par

haath do-chār dhajjiyāñ aa.iiñ

naḳhl-e-ummīd bārvar na huā

phuul aa.e na pattiyāñ aa.iiñ

maiñ ne furqat meñ aaheñ kiiñ do-chār

log samjhe ki āñdhiyāñ aa.iiñ

kal se dil ko jo kal nahīñ paḌtī

yaad kis kī kalā.iyāñ aa.iiñ

maiñ ne likkhe yahāñ se matlab-e-dil

vaañ se likh likh ke gāliyāñ aa.iiñ

ruḳh pe bosoñ ke ban ga.e haiñ nishāñ

ġhāza maliye ki jhā.iyāñ aa.iiñ

hasb-e-va.ada jo kal na aa.e tum

dil meñ lākhoñ burā.iyāñ aa.iiñ

aayā gulshan meñ jab vo sarv-e-sahī

gird phirne ko qumriyāñ aa.iiñ

apne jiine se ho ga.ī nafrat

yaad kis kī rukhā.iyāñ aa.iiñ

jī na lagnā thā hasratoñ ke baġhair

ḳhush huā dil saheliyāñ aa.iiñ

dil taḌapne lagā jo siine meñ

yaad kis but kī shoḳhiyāñ aa.iiñ

ashk-e-hasrat nikal paḌe 'anjum'

uTTho uTTho ki būñdiyāñ aa.iiñ

josh par apni mastiyan aain

yaad kis ki ye shoKHiyan aain

baaton baaton mein le liya dil ko

tumhein kyun-kar ye phurtiyan aain

kahin un ko na yaad aaya hun

aaj kyun mujh ko hichkiyan aain

donon aalam hue tah-o-baala

un ko kyun KHush-KHiramiyan aain

ruk raha dam jo aa ke aankhon mein

yaad kis but ki ankhDiyan aain

baal khole naha rahe the wo

kya hi ghir ghir ke badliyan aain

tum jo soe to talwe sahlane

meri aankhon ki putliyan aain

phir lagate ho mehndi hathon mein

yaad phir rang-reliyan aain

josh-e-wahshat ke din phir aa pahunche

muzhda ai dil ki beDiyan aain

paD gaya hath jab gareban par

hath do-chaar dhajjiyan aain

naKHl-e-ummid barwar na hua

phul aae na pattiyan aain

main ne furqat mein aahen kin do-chaar

log samjhe ki aandhiyan aain

kal se dil ko jo kal nahin paDti

yaad kis ki kalaiyan aain

main ne likkhe yahan se matlab-e-dil

wan se likh likh ke galiyan aain

ruKH pe boson ke ban gae hain nishan

ghaza maliye ki jhaiyan aain

hasb-e-wada jo kal na aae tum

dil mein lakhon buraiyan aain

aaya gulshan mein jab wo sarw-e-sahi

gird phirne ko qumriyan aain

apne jine se ho gai nafrat

yaad kis ki rukhaiyan aain

ji na lagna tha hasraton ke baghair

KHush hua dil saheliyan aain

dil taDapne laga jo sine mein

yaad kis but ki shoKHiyan aain

ashk-e-hasrat nikal paDe 'anjum'

uTTho uTTho ki bundiyan aain